終於輪到小妹子~Student of the Month

小妹子呀, 妹子!!!
老師終於選你嘞...  

嗚嗚嗚...

Mami 等咗好耐嘞!!!

 以低年級小朋友嚟講, 
選到做Student of the Month, 
就等於响班唔百厭, 
冇攪攪, 
亦冇多咀多事幹... 

小一學年, 
仲有兩個月就完嘞, 
老師而家先至選小妹子,
即係响老師心目中, 
妹子未算係乖小朋友!!! (家姐當年第ニ個月就選中) 。

絕對可以想像到, 
之前嗰幾個月, 
呢隻小鬼响classroom 表現認真麻麻...

Anyway, Congratulations, baby!!!

I love you!!!

Disney ~ California Adventure

Disney 做緊2fer, 
上個月去咗 Disneyland, 
30日內可免費去California Adventure 再玩過!!! 

3/27, last chance, 
再唔用張ticket 就到期唔用得嘞!!!

今日, 星期三, 
啲女放早學, 
希望冇咁多人。

上次係二月最後一個Friday去Disneyland,   
本來以為冇セ人, 
點知一樣排隊排餐死, 
唔明啲人好似唔駛做, 
咁得閒去玩？(噢, 我老公都係...)

同上次一樣, 
我哋冇預先同女講會去玩。 

一放學, 
我呃啲女話我要出去睇醫生, 
叫小韻嗱嗱聲做功課, 
仲係邊食住hot dog 邊努力做。 
爸B見佢個樣好唔開心, 
就將個真相講俾佢哋知, 
妹子興奮到嘢都唔食, 
不停咁跳舞...

1:30pm

出發!!!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

去到Disney Parking Lot... 
吓？要泊上6/F (天台) ？
又係好多人？
啲人真係好得閒啫, 
有冇攪錯？

 

跳樓機...

特別介紹新開嘅"Toy Story Midway Mania "

如果你覺得Buzz-lightyear 射槍遊戲好好玩的話, 
呢個3D 要戴立體眼鏡玩嘅Toy Story Mania 就更加有趣, 
有機會嚟LA, 必玩!!! 
(排隊需時40 min... 冇fastpass!!!)

今日呢個放學後surprise, 
啲女非常滿意!!! 

 

我, 因傷風感冒頭重重, 
喉嚨痛到想死!!!

長頂粉？

哈 哈 哈...

哎吔, 女, セ咩係"長頂粉"呀？

小妹子放學好肚餓, 要食"長頂粉"? 

問咗佢好耐, 我都唔知係セ東東?

講到佢發哂脾氣, 佢點努カ形容, 我都唔明???

哦... 加甜醬, 加豉油, 一條條, 原來係講"豬腸粉"... 

死未！??
 
我哋呢度只有中式超市盒裝現成, 
自己响屋企蒸番熱嘅"腸粉", 
邊得香港咁方便又好味嘅"長頂腸"丫...

真係俾妹子激死...

笑鬼死!!! 

Happy 7th Birthday ~ 小妹子...

眨吓眼, 我呢隻小豬旦就7歲嘞...

湊佢真係勞心勞力, 由佢响我肚入面開始, 佢已經係個"trouble maker", 超級麻煩友... 

未出世已經嚇到我半死, 最初做AFP Screening (Blood Test), result 出嚟係positive, 即係話妹子可能有"唐氏綜合症", 真係喊足我幾個星期, 全家人都担心到不得了!!! 當我照ultra-sound見到佢食手指, 心痛到好似刀割一樣！最後, 我要抽胎水再驗, 証實咗佢冇問題, 但都要等佢出咗世, 見到妹子, 大家先可以真真正正鬆一口氣!!! 

妹子BB 到3歲嘅時候, 係最百厭, 睇少一眼都唔掂。 

佢快手快腳, 眨一眨眼, 就唔知走咗去邊, 我成日都要揾佢, 嗌住佢...

佢一唔响我視線範圍, 我就好驚, 因為佢必定做緊"壞"事...  我以前連講個電話都唔敢, 因為佢試過由厨房張枱, 爬上厨櫃, 一路爬, 上咗去煮食爐, 預備開火!!! 嗰陣佢未夠一歲!!!

嗰陣時啲食飯櫈要反轉放上餐枱, 因為佢跌過好多次, 起哂"瘤"。

BB High Chair 係困佢唔到, 縛住佢都照樣可以爬出嚟坐响high chair枱面先可以餵飯仔...

佢會照鏡自己剪頭髮。

全家去旅行, 响Hotel 跌斷手, 食番梘嘔足成晚... 

佢啲"曳"嘢真係多到講唔哂!!!

好彩, 妹子而家漸漸變乖, 變得可愛, 更成為Lulu 家嘅爆笑小豬旦!!!

佢唯一冇變, 就係一直都好黐我, 好錫我, 係個孝順女!!!

Happy Birthday, Tiffany!!!  I love you!!! 
                                    

Stephanie's B'day Party

3/29 Sunday, 
小妹子嘅 friend ~ Stephanie 生日, 
 請去Pump It Up !!!

今次嘅party, 
我哋點都要去, 
事關人哋邀請咗妹子去佢屋企玩好多次, 
我都唔得閒去, 
眞係好唔俾面。 

唔想人哋亞媽覺得我"寸", 
就算係唔想去, 
都要參加,
禮物仲要大份啲潻...

可惜, 我都係衰咗, 
睇錯時間... 遲大到!!!

我實在太傷風咳, 
為咗唔想傳染人哋, 
drop-off 妹子就返屋企, 
所以都影唔到靚相。

3pm party end ~ pick up 番女...

 

Pump It Up 呢個大型室內遊戲場, 有3個差唔多標準籃球場咁大遊戲室, 各有三、四個巨型吹氣氣墊, 有唔同高度, 斜度, 長滑梯同籃球場。

小朋友可以响一個半鐘內盡情大叫大跳, 之後, 就有專人服侍嘅 pizza party。
响private room 入面食嘢同拆礼物, 啲parents 可以繑埋對手輕輕鬆鬆互相傾吓八吓!

聽講大約係USD300 for 25 個小朋友。

合唔合理?! 見人見智啦!!!
如果唔想請大班細路番屋企玩, 兼執餐矇, Pump It Up 都係一個唔錯嘅選擇嘅!!!

Chino Hills Library Ribbon Cutting Ceremony

好榮幸, 
小韻獲邀代表佢間小學, 
參加新起嘅City Halls ~ 公共圖書館開幕剪綵典禮!!! 

星期四番學校做AR, Librarian 同佢講, 
選咗佢同另外4個小朋友參加"Ribbon Cutting Ceremony",
因為佢係5th Grade AR 最高分。 

之前一日去Disneyland, 
玩到好攰, 
我同小韻都好辛苦先可以起到身, 
9:05am要去到新Library。

噚日天氣相當好, 
唔算好熱, 
如果唔係, 
要我哋露天地方曬住坐定定, 
參加呢啲什麽什麽不停有人講嘢嘅典禮, 
一定頂唔順~暈低!!!

 

Chino Hills Mayor (市長)

 

全個City 只邀請咗Wickman Elementary 嘅小朋友參加典禮, 
雖然只係"茄喱啡" 企响度影張相, 
但, 能夠成為Chino Hills History 一部份, 
已經係個好難得機會, 
絕對係小韻嘅honor 啊!!!  

所以, 之前一日玩得幾攰都好, 
我都要捉小韻早啲起身去參加!!!

 

 奇怪?? 學校今次會揀5個亞洲小朋友做代表... 
3 Korean, 2 Chinese...

** AR ~ Accelerated Reader, 每讀完一本書, 番學校computer room 做一份問卷, 答啱就有分, 每本書分數唔同由0.5分至40分不等, 以書深淺度平分, 而累積分數高就可以有獎牌, 250分銅獎, 500分銀獎, 750分金獎, 1000分白金獎。

小妹子 1st Grade ~ 31.9分

小韻  5th Grade ~ 779.7分 (今年累積會有銀, 金兩個獎)