寂寞港孩 与 廿分鐘聆聽者

忽然記起返港期間一件小事...

小韻生日, 
去遊海洋公園,

回程等巴士嘅時侯, 
有個十歲"哥哥仔"同我搭訕。

我見佢青靚白淨, 
整整齊齊, 
睇落幾醒目, 
就不妨同佢嗲幾句!!! 

哈, 
香港小朋友, 
果然係唔同, 
說話有文有路, 
非常"老積", 
唔似得我兩個女, 
傻傻更更咁!!! 

我奇怪父母點會放心俾佢一個人仔走嚟海洋公園玩?? 
原來身後有個不停煲電話粥嘅菲傭跟住...

佢同我講, 
爸媽都忙, 
平日只有菲傭帶佢四圍去,
就算大人放工返屋企, 
都係冇時間陪佢玩, 
同佢傾偈... 

聽到小男孩呢番話, 
我覺得佢好可憐, 
我心好酸.... 

反而小朋友講嘅時候, 
冇唔開心, 
好平常,
或者佢早已經習慣咗。

後來, 
我哋等咗好耐都唔見有巴士, 
老公就拉住我哋走去截的士, 
小男孩好唔捨得我, 
大聲叫 : "喂, 你哋去邊呀? 唔等巴士咩? "  
我只有回頭同佢揮手講"拜拜"。

**************************************************************

一個四年級小朋友, 

竟會主動撩我呢個陌生姨姨傾偈,
我可以感受到佢好孤單, 
好渴望有人可以聽佢, 
陪佢。

作為廿四小時全職照顧孩子嘅媽媽, 
我同情小男孩, 
亦為佢父母難過。

知道同樣嘅例子, 
香港多的是, 
大家都要為口奔馳而忽略孩子... 

我只有祈望各位父母, 
盡可能抽多啲時間陪小朋友, 
物質上嘅富足,
並唔能夠治療寂寞嘅小心靈, 
佢哋真係好需要你...

小男孩, 我祝福你!!!