當我又再想起您

時間過得好快, 

眨下眼,
至愛嘅Danny 已經離開咗20年... 
偶像生日,

異常想念...

以下呢篇Blog,

係我 2009 年 Yahoo post 過,

好想再次同大家分享,

我同Danny 最近距離接觸...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

初出茅蘆, 响電影公司宣傳部做 PR Assistant, 即係"妹仔釘", セ都要做。  
聖誕節, 公司攪咗個special event, 請 Danny Chan 做開幕嘉賓。  
全人類都知我鍾意Danny, 當大家知道呢個消息, 都戥我高興。  
我直頭一諗起就儍笑!!!  
可惜, function 嗰十日, 我要負責賣Video。 攤位距離入口鬼咁遠, 我一定睇唔到opening啦, 冇得見 Danny, 失望到想死 ~ 謝哂 !!!

開幕日, 靚女"波屎" 一早call 醒我 :  "靚"妹, 要化粧呀, 靚啲呀, 千祈唔好失禮吓!! 
我心諗 : 攪セ呀?? 我負責個booth 咋喎, 又冇Danny 睇, 駛鬼咁靚咩?!  我咁青春, 唔化粧都夠靚啦!!! 係肥咗啲啫!!! 咪玩我啦!!! 
點知, 去到會場, 原來 "皮屎" 整隻好牌我上, 叫我去幫手剪綵儀式, 要我做"歡樂小姐" 。 
嘩!!! 俾我上台見偶像, 興奮得我 ~ 即時醒哂!!!

無端端對我咁好, 唔通.................... 因為我靚??!!(hehe...) 
一個美術部, 平日冇セ兩句, 連名都唔知嘅有型四眼仔同事, 自告奮勇話幫我影相!! 
當我行近Danny, 將手上隻Minnie Mouse 送俾佢嗰陣, 心跳加速, "澎澎"聲 ~ 差啲暈低!!!
Danny 就好温柔一句 : "Thank you." 
噢!!! 我死了 !!!

其實, 我更羨慕負責去接 Danny 到會場嗰位女同事, 可以同Danny "同車", 就算要响下等成個鐘, 我都願意!!!

Danny ~ 永遠愛您 !!!