不快樂的中秋！小妹子病倒了！

LA 呢幾日嘅朝早涼咗好多, 
大概得17度左右, 要着外套。 

但係, 一到晏晝, 
又熱到34、35度,  
攪到好多小朋友都病咗！ 
一個做護士嘅媽媽同我講今年嘅"Flu Season - 感冒季節" 好似嚟早咗！

終於輪到小妹子!

噚日(中秋節星期日), 
佢一早爬上我張床, 
猛話頭痛好辛苦,
瞓唔到, 
我摸吓佢頭仔, 
原來有燒！

我俾咗藥佢食, 
之後再瞓番, 
到下晝又好開心玩！

晚黑, 佢想同家姐出backyard 點蠟燭玩(我哋冇買燈籠 ), 
但我唔俾, 
怕佢哋凍親！

到咗半夜佢又燒過, 
仲好高燒tim, 
担心死我成晚冇瞓! 

今日幫佢請假冇番學, 
晏啲要帶佢睇医生。

我至憎睇Dr. So, 
睇親佢要等兩、三個鐘, 
冇咗大半日時間, 
冇病都等到有病！

老公call 去make appointment, 
Dr. So 啲姑娘hold 咗佢電話兩次, 
每次十五分鐘, 
之後仲話最快要下星期一至有得睇！
真係嬲到火都嚟, 
佢仲我老公有急病去emergency 囉！
咁做医生都得嘅！痴綫！

激氣! call 去保險公司投訴佢兼換醫生, 
呢啲就係美國医療失敗之處, 
規定只可以揀一個医生, 
睇專科要申請, 
轉醫生又要等成個月, 死未！

小妹子呢個學期冇得攞 perfect attendance 獎喇！

只係剩番兩星期零兩日就off-track 放假,  
上年呢個時候, 
我哋不知幾緊張, 
要ready 去日本同番香港!!! 

今年就冇plan, 
冇地方去, 
一個月假, 做乜好呢？ 

無端端, 買3G

真係激死！

老公今日明明話出去郵局同買麵包, 點知番嚟之後就話有嘢送俾我, 仲"懶"神祕咁叫我估係乜？！

原來佢無端端走去出咗部 3G iphone, 
我的確係好surprise, 
但一啲都唔開心喎！

老公諗住我會勁興奮, 
好多謝佢, 
可惜, 我唔多領情！
(係咪好衰？)

如果我仲有番工, 
又或者响香港, 
有部 iphone 我會用得著。

我而家不過留响屋企湊女嘅"師奶", 
有部Razor實在足夠有餘, 
(加上好少人call 我.....) 
我真係唔使買3G iphone 咁update啫！ 嘥錢！

我老公就係咁, 
成日失驚無神買嘢俾我, 
或同我update 啲對我無途唔大嘅"電子產品"....
我都冇話要買！

唉！

5.4級地震呀！

年初時侯嘅Chino Hills.... 
有雪山景睇呀.... 

今早大約11:35am, 我好歎咁"攤"响張牀, 上網聽住港台昨日嘅"瘋show快活人" , 突然間, feel 到地震, 搖得幾厲害, 大概維持5-7秒左右。 

我立即响牀跳起, 跑到門框下面, 聽住好多嘢跌咗落嚟, 同"轟轟轟"物件搖晃嘅聲音, (好似坐响舊款火車咁嘅聲)。Mochi 就不安咁行來行去, 而隔籬屋兩隻狗就嚇到吠得好大聲！之後, 電話, 電腦中断咗一段短時間。

今次地震嘅時間同震嘅威力都比我以往經歷過嘅長咗同厲害咗,(之後, 仲有好幾次餘震),  但我冇担心自已安全; 反而係驚家姐妹妹响學校當時嘅情況！11:30am 係傻瓜妹妹嘅lunch hour, 我怕佢地震嗰時, 手仲捧住成 tray都係chicken nuggets 同Milk Milk (今日lunch menu), 唔知佢點算？有乜跌哂落地！？驚唔驚？定係戇居居, 唔知發生緊咩事呢？！

加州處於地震帶, 所有起嘅房屋, 大廈(就算係用木造), 都有防震功能, 較為安全。

同四川地震比, 嗰次真係恐怖好多.....

PS> 原來今次嘅震央就係Chino Hills, 怪唔知得啦！

小妹子話地震嗰陣佢响操場玩緊, 而家姐就係課室, Teacher 叫小朋友"呢" 埋枱下面.... 大家只當係一個演習, 所以冇驚, 仲話好玩！

七月七日, 開學了！

開學日, 
升小五嘅小韻, 
大踏步, (想叫停, 愈叫愈走), 
佢好心急, 
行去課室放低書包, 
再去排隊meet 佢啲friend！

小妹子升小一, 
第一日番學, 
好眼瞓, 
又好迷惘！

當大家忙住計劃悠長暑假, 
我啲女已經開始咗新學年！

學校係"Year Round Schedule" 全年學制, 
全校過千小朋友每級分成A、B、C、D 四個Group, (我哋叫Track), 
輪住放假, 
每番三個月學, 
就會放一個月假。 
呢種schedule响美國公立小學並唔普遍, 
只係人口較多新社區先會有。

正所謂: "夏日炎炎, 正好眠！"  
响大熱天時番學, 
的確好辛苦！
尤其係lunch hour, 
就算外面好曬好熱, 
學校都規定小朋友要响户外有蓋 lunch table 食lunch;  
所以, 每年呢個時候, 
兩姐妹都會晒到"黑黝黝"！

之前放咗七個星期break, 
小韻妹妹都話唔想番學,
我都好明白, 
我係佢哋都會咁話, 
就算响屋企百無聊賴, 
左"灘"吓, 右"灘"吓, 
都不知幾爽！
但要番學, 
有乜辦法啫....

悼‧婆婆

噚晚已經有啲唔舒服, 今早起身仲係暈暈哋, 作嘔作感冒, 所以送完小韻妹子, 再爬上牀瞓多陣, 於是, 我夢見....

"媽咪同婆婆打緊麻雀, 佢哋仲叫我攞蛋糕、麵包送上楼上俾鄰居小朋友"婷婷"。

之後, 我就俾電話嘈醒, 原來我妹打嚟通知我, 婆婆已經走咗嘞！ 嗰陣係上晝十點, 大約係婆婆走咗之後三個鐘頭。

或者, 婆婆好掛住我, 想見吓我先走, 所以响我夢中出現.... 我冇驚, 知道婆婆想話俾我聽, 佢要走....

婆婆好錫我, 因為我同弟妹年紀相差好遠, 細個嗰陣, 只得我一個孫女, 且有一段時間係佢照顧我, 所以特別寵我, 我鐘意嘅, 婆婆都會買俾我。

慶幸上年十月番香港時探過佢(算係最後一面吧！), 佢跌断腳入咗醫院, 雖然佢瞓咗响牀唔郁得, 但精神好好, 仲同我飛吻潻！ 

我好難過, 但又好安慰, 婆婆係响睡夢中靜靜咁走, 冇痛苦。 或者上天覺得一向體弱多病嘅婆婆已經捱夠, 所以就俾佢走得舒服啲、輕鬆啲！

"婆婆. 唔駛担心公公, 大家一定會好好睇住佢！放心啦！你見到姨媽同五姨就同佢講我都好掛住佢哋, 我知道佢哋都會好好照顧你。婆婆, 天家再見...."

小韻的十歲生日派對

每年都會幫小韻開個簡單生日party, 
請佢幾個最friend 女仔番嚟屋企食嘢同打機。

前兩年好懶, 
買Happy Meal 或 Chick-Fil-A 加個旦糕就算...

佢哋志在玩, 
食乜嘢都冇所謂...

今次, 個女講明要我整, 
因為"肥妹仔 - Ryann" 想食 "Egg Roll - 春卷" 喎！

專登出Target 買咗個Food Tray 連杯套裝, 
好似飛機餐咁, 
一人一份...

睇落冇乜嘢食, 
但已經忙咗我成日。 

算啦！
一年一次, 
小朋友開心就OK啦！

至高興就係"肥妹仔", 
一個人仔食咗三條半春卷, 
再加兩件 New York Cheese Cake 同一大盆西瓜再西瓜.... 
嘩！肥得佢丫！

嬴咗！攪掂！

"If I ruled the world, I would build a zoo to protect all animals."

小妹子得到 K-2, 3rd Place...

 "If I ruled the world, I would make sure no one will harm the ocean."

 小韻得到3-4th Grade Visual Art,1st Place...

Writing,2nd Place...

 緊張咗成個星期, 我哋
終於收到 Invitation 嘞！
明晚七時, 
兩姐妹齊齊上台攞獎！